Category Archives: سەرنجەكانم لەسەر دیواری فەیسبووك

کۆتایی جەنگ و سەرەتای لەیەكدی تێگەییشتن

کۆتایی جەنگ و سەرەتای لەیەكدی تێگەییشتن

 

هەر کات زۆرینەی موسوڵمانانی جیهان لە ئاستی کۆمەڵکوژیی یەهودیانی دەوروبەری مەککە و مەدینە لە سەرەتای ئیسلامدا، هەستی بە شەرمەزانی و پەشیمانی کرد و داوای لێبوردنی لە یەهودیان کرد؛

 

هەر کات زۆرینەی مەسیحیانی جیهان لە ئاستی ڕەوایەتیدان بە داگیرکاریی و کۆمەڵکوژیی کۆمەڵە نامەسیحییەکانی دیکە و ٥٠٠ ساڵ داگیرکاریی، هەستی بە شەرمەزانی و پەشیمانی کرد و داوای لێبوردنی لە گەلانی ژێردەست کرد؛

 

هەر کات زۆرینەی سپیپێستان لە ئاستی هەڵاواردنی نەژادی [ئاپارتاید] و بازرگانی کۆیلان هەستی بە شەرمەزاریی کرد و داوای لێبوردنی لە ڕەشێستان کرد؛

 

هەر کات زۆرینەی دانیشتووانی ئیسپانیا لە ئاستی کۆمەڵکوژیی سوورپێستان هەستی بە شەرمەزاریی کرد و ئەوروپیانی نیشتەجێی ئەمەریکا داوای لێبوردنی لە سوورپێستان کرد؛

 

هەر کات زۆرینەی دانیشتووانی ئێنگلاند لە ئاستی کۆمەڵکوژیی ئۆریجنەکانی ئوسترالیا هەستی بە شەرمەزاریی کرد و ئەوروپیانی نیشتەجێی ئوسترالیا داوای لێبوردنی لە ئۆریجنەکانی ئوسترالیا کرد؛

 

هەر کات زۆرینەی دانیشتووانی بریتانیا لە ئاستی کۆمەڵکوژیی ئۆریجنەکانی نیوزلەندە هەستی بە شەرمەزاریی کرد و ئەوروپیانی نیشتەجێی ئەمەریکا داوای لێبوردنی لە ئۆریجنەکانی نیوزلەندە کرد؛

 

هەر کات زۆرینەی دانیشتووانی ئەوروپا لە ئاستی داگیرکاریی و پاوانگەریی و چەپاوڵگەریی گۆشەکانی دیکەی جیهان لەلایەن ئیمپراتۆریی و دەوڵەتەکانیانەوە هەستی بە شەرمەزانی و پەشیمانی کرد و داوای لێبوردنی لە گەلانی ژێردەست کرد؛

 

هەر کات زۆرینەی دانیشتووانی تورکیە لە ئاستی کۆمەڵکوژیی ئەرمەنیان هەستی بە شەرمەزانی و پەشیمانی کرد داوای لێبوردنیان لە ئەرمەنی کرد؛

 

هەر کات زۆرینەی کوردان لە ئاستی هاریکاریکردنی کوردان لەتەك ئیمپراتۆریی ئوسمانیدا لە کۆمەڵکوژیی ئەرمەنیی و ئێزیدیان هەستی بە شەرمەزاریی و پەشیمانی کرد و داوای لێبوردنی لە ئەرمەنیان و ئێزیان کرد؛

 

هەر کات زۆرینەی دانیشتووانی ئاڵمانیا لە ئاستی کۆمەڵکوژیی یەهودیان هەستی بە شەرمەزاریی و پەشیمانی کرد و داوای لێبوردنی لە یەهودیان کرد؛

 

هەر کات زۆرینەی دانیشتووانی روسیا لە ئاستی کۆمەڵکوژیی راپەڕیوانی کڕۆنشتات و ئۆکرانیا هەستی بە شەرمەزاریی و پەشیمانی کرد و داوای لێبوردنی لە دانیشتووانی کڕۆنشتات و ئۆکرانیا کرد؛

 

هەر کات زۆرینەی یەهودیانی جیهان لە ئاستی داگیرکاریی و دەرپەڕاندن و بێمافکردنی فەلەستینیان هەستی بە شەرمەزاریی و پەشیمانی کرد و داوای لێبوردنی کرد؛

 

هەر کات زۆرینەی دانیشتووانی ولاتانی عەرەبی لە ئاستی کۆمەڵکوژیی کوردان هەستی بە شەرمەزاریی و پەشیمانی کرد و داوای لێبوردنی لە کوردان کرد؛

 

هەر کات زۆرینەی موسوڵمانانی جیهان لە ئاستی کۆمەڵکوژیی ئیزیدی و مەسیحی و کاکەییان هەستی بە شەرمەزاریی و پەشیمانی کرد و داوای لێبوردنیان کرد؛

 

هەر کات زۆرینەی پیاوان لە ئاستی هەڵاواردنی ژناندا هەستی بە شەرمەزاریی و پەشیمانی کرد و داوای لێبوردنی لە ژنان کرد؛

 

هەر کات زۆرینەی مامۆستایان و دایکان و باوکان لە ئاستی چەپاندن و ئازاردانی منداڵاندا هەستی بە شەرمەزاریی و پەشیمانی کرد و داوای لێبوردنی لە منداڵان کرد؛

 

هەر کات زۆرینەی مرۆڤ لە ئاستی سەربڕین و ئاژەڵئازاریدا هەستی بە شەرمەزاریی و پەشیمانی کرد و داوای لیبوردنیان لە ئاژەڵان کرد؛

 

هەر کات زۆرینەی مرۆڤ لە ئاستی وێرانکردنی ژینگە و شیواندنی سروشتدا هەستی بە شەرمەزاریی و پەشیمانی کرد و داوای لێبوردنی کرد؛

 

هەر کات زۆرینەی دانیشتووانی گۆی زەمین شوناسنامە دەستکردەکانی نەژاد و ڕەگەز و ئایین و نەتەوە و نیشتمان و پارتایەتی و حکومەت و دوەوڵەتی فڕێدان و کۆمەڵی لە کۆی ئازادی و یەکگرتنی ئازادانەی تاکەکانیدا دیت و بوونی تاکی لە خواوەندیی [خودموختاریی] خودی تاکدا پێناسەکرد؛

 

ئەوا مرۆڤایەتی بە ئاستی خۆهوشیاریی گەییشتووە و بەرەو راگرتنی جەنگ و تەبایی و خۆڕزگارکردن و ڕۆنانی کۆمەڵی ئازاد و یەکسان و دادپەروەر هەنگاوی هەڵگرتووە و ناتوانێت لە ژێر سەروەریی هیچ چین و دەستەبژێر و پارتیی و حکومەت و دەوڵەتێکدا بمێنێتەوە، ئەگەر نا نەوە لە دوای نەوە وەك دڕیژەپێدەری لوتبەرزیی و لەخۆنامۆبوون و کوشتوبڕ و وێرانکردن و چەوساندنەوە و خۆکوژیی دەمێنینەوە و تەنیا چەندبارەکەرەوەی گەمژەیی پێشینان و خۆمان دەبین!

Advertisements

ناسیونالیزم و بەهای تاك

ناسیونالیزم و بەهای تاك

ناسیونالیزم وەك ئایدیۆلۆجیای دەسەڵاتخوازیی و نامۆ و ناپەیوەست بە ئازار و خواست و ماف و ئازادی تاك، هەمیشە لە هەوڵی توانەوە و بێنرخکردنی تاکە لە کۆی خۆشباوەڕدا، باشترین بەڵگەش

– تاوان وەك تاوان ناناسێت، بەڵکو بە ژمارەی قوربانییەکاندا، هەر لەبەرئەوەیە، کە هەمیشە ژمارەی قوربانییەکانی گەورە و ڕێك و سەرنجڕاکێش دەکات: ٥٠٠٠ ، ١٨٠٠٠ ، ٢٠٠٠٠٠٠ و …تد چونکە خودی تاک بۆ نەتەوەگەرایی بەهای نییە و هەرچی هەژماری کوژراان کەمتربێت، تاوان قورسایی و ئازاری کەمتر دەبێت

– مرۆڤ وەك ئامراز دەبینێت: ژن نامووسی نەتەوەیە، لە هێڕشی (داعش)یاندا پیاوانیش وەك ژنان دەستبەسەرکران و کۆیلەراگیراون و بەزۆر موسوڵمان دەکرێن و دەکوژرێن و سووکایەتییان پێدەکرێت، بەڵام لەبەرئەوەی کە پیاو خاڵی لاوازی نەتەوە نییە و نابێتە لەکەدارکردنی نامووسپەرستی ناسیونالیزم، کەس لەبارەی ئەو لاوە نێرینە ئێزیدییانە نادوێ، کە لەژێر دەمەچەقۆی (داعش)دان.

رزگارکردنەوەی شەنگاڵ و موسڵ و ناوچەکانی دیکە تەنیا لە گرەوی هێز و بەرەنگاری سەربەخۆی جەماوەردایە، تەنیا لەمپەرێکیش لەبەردەم جینۆسایدنەکردنەوەی ئیزیدی و مەسیحیەەکان، پێکهێنانی خۆبەڕێوەبەرایەتی گەلییانەی گوند و شار و ناوچەکانی خۆیانە!

هەی ناسیونالیستەکان، موسڵ و شەنگاڵ چۆن داگیرکران، بۆ پێناکەنن ؟

هەی ناسیونالیستەکان، موسڵ و شەنگاڵ چۆن داگیرکران، بۆ پێناکەنن ؟

کاتێك کە لە پێلانێکی سازدراودا سوپای عیراقی و دەزگەکانی لە شاری (موشل)دا خۆبەدەستەوەدەدەن و سوپاسالار و پاریزگاری ئەو شارە بەرەو هەولێر و کەنارە ئاوەکانی تورکیە هەڵهاتن، ناسیونالیستە کوردەکان لەجیاتی هاودەردی لەتەك مەسیحییەکان و ئاوارە عەرەبزمانەکان، کەوتنە نووسینی پەیتاپەیتای توانج و پێکەنین و سووکایەتی بە عەرەب و سەربازانی عیراقی.

بەڵام کاتێك کە لەسەر بنەمای هەمان پیلان شار و گوندە ئیزیدی نشینەکان پێشکەش بە هێزەکانی داعش کران و پێشمەرگەی سەر زەل سەر زل و گوچە پان بەرەو هەولێر و دهۆک هەڵهاتن، ئەوانەی بەوانی دیکە پێدەکەنین و خۆیان فشدەکردەوە، سەریان نایەوە نیو خۆڵەپۆتەی شەرمەزاری ناسیونالیزم.

گۆمەکە ئەوەندە قوڵ بووە، چیدی بنی دیار نییە !

سەرەتا هاتنی داعش بۆ عیراق و گرتنی موسڵ، وێرای ئامانجە ئابووریی و رامیارییەکانی زلهێزەکان و دەولەتانی ناوچەکە، زیاتر لەوە دەچوو کە تەنیا توندکردنەوەی ئابڵۆقەی ئابووری لەسەر کانتۆنی جزیرە و خنکاندنی بزووتنەوە نائایینییەکە بێت، کە هەم زلهێزەکان و هەم دەوڵەتی سعودیە و هەم دەولەتی تورکیە و هەم فەرمانداریی هەرێم تێیدا هاوبەرژەوەندبوون.

بەڵام بە بادانەوەی هێڕشەکانی داعش بۆ سەر هەرێم و فریاکەوتنی هێزە پاریزەرەکانی کانتۆنەکان و پاشان کۆمەکی دەولەتی ئەمەریکا و دەوڵەتانی ئەوروپا و فەرمانداریی عیراق بۆ فەرمانداریی هەرێم، ئەو گومانەی دروستکرد، کە پلانەکە تەڵەنانەوە بێت بۆ دەولەتی ئێران.

بەڵام کاتێك کە دەنگی پاسداران شان بە شانی چەکدارانی فەرمانداریی هەرێم دەبیستین و لە هەمان بەرەشدا ئۆپۆزسیۆنی ئێرانی هەن، ئیدی ئاوەکە ئەوەندە لێڵ دەبێت، کە بنی گۆمەکە نابینرێت.

خەریکە من دەگەرێمەوە سەر گومانی یەکەم، کۆکردنەوە و بەکوشتدانی لاوە توندڕەوەکانی ئەوروپا، کە بەگوێرەی سەرچاوەکان ٤٠٠ کەس لە ‌هێزەکانی داعش ڕەگەزنامەی ئاڵمانییان هەیە و ئەوەش کە ژورنالیستە ئەمریکییەکە سەردەبڕیت، ئەکسێنتی بریتانی هەیە و ئەگەر ئەو لاوە توندڕەوانەی کە لە ئاڵمانیا و بریتانیا و وڵاتانی دیکەی ئەوروپاوە گەراونەتەوە و ئەوانەی کە لە تورکیەوە هاتوون لەنێو هیزەکانی داعش دەربکەیت، لەوانەیە چەند سەد کەسێکی سووری و عیراقی و کورد و مەغریبی و (جەزائیری)یان لێ بمێننەوە!

ئەرێ بەراست، پرسی دەولەتی کوردی و واژۆکانی سەر پێگەی فەرمی دەوڵەتی ئەمەریکا چی بەسەرهات ؟

ئایدیۆلۆجیا زادەی ئایینە و هزر و بزووتنەوە کۆمەڵایەتییەکان زیندەبەچاڵدەکات

ئایدیۆلۆجیا زادەی ئایینە و هزر و بزووتنەوە کۆمەڵایەتییەکان زیندەبەچاڵدەکات

بۆ رامیاران و ئەندامانی پارتییەکان، هەر کەس نەڵێت “بژی …” و “بڕوخێ ..” شۆڕشگێر نییە، هەر کەس ئەندامی پارتییەکەیان نەبێت، خەباتکار نییە، هەر کەس پێچەوانەی ئەوان یا جیاواز بیریکردەوە ئەوا دۆژمنی شۆڕش و پڕۆلیتاریایە، هەر کەس دەقە مردووەکان دەرخنەکات، نەزانە، هەر کەس بەبێ ڕیزکردنی کۆمەڵێك سەرچاوەی ناپەیوەست یا مێتۆدیكی دیکە بۆ ڕەخنەگرتن بەکاربەرێت، ڕەخنەی زانستی نییە … و تد، ئەمە لە کاتێکدا کە مێژووی دوو سەدەی رابوردوو فێرماندەکات، کە پارتایەتی و ڕامیاریی لەنێوبەری شۆڕشگێڕیی و خەسێنەری هزرینی تاکە یاخییەکانن.

بەبۆچوونی من هەر ئەو تێڕوانینە بوو، کە پاش ڕوخانی ئیمپراتۆری بۆلشەڤیکی لە ساڵی ١٩٨٩دا هەزاران و بگرە سەدان هەزار لە ئەندامی پارتە کۆمونیستەکانی جیهان بەرەو ناسیونالیزم و ئایین و خۆدەولەمەندکردن ڕەتاند.

ئەمە یەکێکە لە هۆکارەکانی برەوسەندنی ئایدیۆلۆجیاکانی سەرمایەداری ..

ئەگەر چەکدارانی داعش موسوڵمان نین …. ؟

ئەگەر چەکدارانی داعش موسوڵمان نین …. ؟

بە بۆچوونی من، ئەگەر گروپ و پارتییەکان و رامیارانی ئیسلامی و نێوەندە جیهانییەکانی ئیسلام و یەك ،لیارد و نیو موسوڵمانی جیهان، داعش بە ئیسلامی نازانن ، دەبوو یەکەمین کەسانێك کە دژی داعش بجەنگن، مەلا و گروپ و پارتییە ئیسلامییەکان و موسوڵمانانی سوریە و عیراق بن، کە چەکهەڵگرن و بەر بە گروپێك بگرن، کە بە قسەی ئەوانی دیکە [گروپ و پارتییە ئیسلامییەکان] دژی ئیسلامن. هەروەها دەبوو لە هەنگاوی دووەمدا گشت نێوندە جیهانییەکان و گروپ و پارتییەکان و موسوڵمانای جیهان دژی داعش چەکهەڵگرن و بێنە سوریە و عیراق و لەنێویان بەرن، چونکە ئەوان بەناوی ئیسلامەوە مەسیحی و ئێزیدییەکان جینۆساید دەکەن و هێڕش دەکەن سەر شیعە و کوردان!

ئەگەر موسوڵمانەکان و گروپە ئیسلامییەکان ئەو کارە ئایینییەیان بۆ خواکەیان ئەنجامبدایە، ئەوا بیانووش بۆ هاتنی سەربازانی دەوڵەتی ئەمەریکا و چەکفرۆشی دەوڵەتانی دیکە نەدەمایەوە! بەڵام بەپێچەوانەی پاگەندە و پاساوی موسوڵمانان و گروپە ئیسلامییەکانەوە، ئەوە دەوڵەتی سعودیە بە پارەی حاجیانی کورد و ئەوە حکومەتی ئیسلامی تورکیە کە بە پارە و چەك و پۆشاك و ڕاهێنان هێزەکانی داعش لە سەرتاسەری دونیا کۆدەکەنەوە و بەریاندەدەن گیانی خەڵکی سوریە و عیراق، ئەوە بێدەنگەکردن و چاونووقاندنی موسوڵمانانی جیهان و لە پێش هەمووانەوە موسوڵمانای کوردە، کە چەکدارانی داعش بۆ مرۆڤکوژی هاندەدەن!

تکایە هەر دۆستێکی موسوڵمان کە لەم بارەوە بۆچوونێکی دیکەی هەیە، یا بە بەڵگە دەتوانێت بۆ ئێمە هاوبەشی گروپە ئیسلامییەکان و موسوڵمانانی جیهان لەپێش هەموویانەوە گروپە ئیسلامییەکان و موسوڵمانانی هەرێمی کوردستان، ڕەتبکاتەوە، با ڕەخنەمان لێبگرێت و بەرچاومان ڕۆشنبکاتەوە ..

دونیا فوتبۆڵی بەرپێی ڕامیاران و سەرمایەدارانە

دونیا فوتبۆڵی بەرپێی ڕامیاران و سەرمایەدارانە

تەنیا وێنەیەکی گونجاو بۆ نیشاندانی دونیا و سەروەریی سەرمایە شکدەبەم، وێناکردنیانە بە یاریکەرێك و فوتبۆڵێك، کارتێك یاریزانێك شەق لە فوتبۆڵێك هەڵدەدات، هیچ کات بیر لە زیانمەندی فوتبۆڵەکە ناکاتەوە، ئەو تەنیا پێکانی ئامانجی مەبەستە، هەرچەندە براوە و سوودمەند تەنیا خۆیەتی، کەچی کەسانی تەماشاکەر لەپێناو چەپڵەڕێزاندا بۆ ئەو، ملی یەکدی دەشکێنن!

ڕامیاران و سەرمایەدارانیش بە هەمان شێوە، بۆ ئەوان گرنگ نییە چەند کەس دەکوژرێن ، چەند کەس برسی دەبن، چەند کەس بێکار دەبن، چەند کەس لانەواز دەبن، چەند کەس بێدایك و بێباوك دەبن، چەند کەس تووشی وەرەم و نەخۆشییەکانی دیکە دەبن، چەند کەس ئاوارە دەبن، چەند کەس ڕکیان لە یەکدی دەبێتەوە، چەند گوند و شار و هەرێم وێران دەبن، چەند ئێتنی و گروپ جێنۆساید دەکرێن، چەند ئاژەڵ ئازار دەدرێن و دەکوژرێن، چەند ژینگە پیسدەکرێت و چەندە سروشت تێکدەدرێت …تد بۆ ئەوان گرنگ دوو شتە: سەروەرمانەوەی خۆیان و دابینکردنی مشەخۆریی خۆیان و بەکرێگیاروانیان .

بەداخەوە هەر سات و هەر ڕۆژ ئێمەی ژێردەست و بێدەسەڵات ئەم دیمەنانە دەبینین، کە چۆن ڕامیاران و سەرمایەداران گۆی زەوییان کردووەتە فوتبۆڵی یارییە ڕامیارییەکانیان، کەچی چەوساوانی ناهوشیار و خۆشباوەڕ بەدەست و سنگ و سمتیان چەپڵە و تەپڵ بۆ براوەکان لێدەدەن !

تەنیا بۆ نموونە سەرنجبدەن: دەوڵەتانی ئەوروپا و ئەمەریکا و خۆرهەڵاتی ناوین بەخۆیان گروپە ڕامیارە ئیسلامییەکان دروستدەکەن و هەر بەخۆشیان جەنگ دژیان بانگەوازی جەنگ دەدەن و لە ناردن و فرۆشتنی چەکدا کێبڕکێ دەکەن و چەوساوانی ناوچەکەش بە هەموو توانایانەوە وێرای قوربانیبوونیان، چەپلە بۆ رامیاران و کارخانەکانی چەکسازییو دەوڵەتان [چەسێنەرانیان] لێدەدەن و پیرۆزیاندەکەن.

ئەفسوونی خۆکوژی و یەکدی کوژی مرۆڤەکان

ئەفسوونی خۆکوژی و یەکدی کوژی مرۆڤەکان

گەورەترین و سەرەکیترین گرفتی مرۆڤی سەردەم ئەوەیە، کە کولتوور و یاسا و میدیا و بەرژەوەندی سەروەرانی ئاوا لە قاڵبیداوە، کە لە بەیانییەوە کە لە خەو رادەبێت تا شەوان کە دەخەوێت، پێویستی بە هێزكی سەرووی خۆی هەیە، تا پێیبلیت ئاوا بکە و وا مەکە، ئاوا بیربکەرەوە و وا بیرمەکەرەوە، ئەوە ڕاستە و ئەوە درۆیە.

ئەگەر مرۆڤ/ تاک بتوانێت خۆی لە تەلیسمی ئەو هەژموونە ڕزگاربگات، ئەوا هیچ هێزیك لەپێش گروپ و پارتیی و رامیاران و فەرماندارییان و دەوڵەتان و سەرۆکانەوە نامێنێت بۆ جەنگ و یەکدی کوژی!

نامەیەك بۆ لاوانی شۆڕشخواز و ئاتەئیست/ ئەیتیئیست [Atheist]

نامەیەك بۆ لاوانی شۆڕشخواز و ئاتەئیست/ ئەیتیئیست [Atheist]

ئازیزان، گیانی یەك تاکی شۆڕشگێڕ لە هەموو پارتیی و تاکتیك و ستراتیجە ڕامیارەکان بەنرخرتر و مانەوەی پێویستترە !

تکایە هوشیارانە بیر لە هەر چالاکییەك بکەنەوە، کە ئەنجامدەدەن، بیر لە ڕەهەندەکانی چالاکییەکان بکەنەوە و لایەنە پۆزەتیڤ و نیگەتیڤەکانی بەراوردبکەن، لەوە گرنگتر ئەوەیە، کە بزانین ئەو چالاکییەی کە ئەنجامیدەدەین، سەرەنجام بە قازانجی کێ تەواودەبێت و چی بەدوای خۆیدا دەهێنێت.

پێویستە هەر یەك لە ئێمە ئەوە بزانێت، کە توندوتیژی تەنیا توندوتیژی بەرهەمدەهێنێت، هەروا کە کۆنەپەرستی و دەمارگیری [مەزهەب و ناسیونالیزم و ڕەیسیزم و شۆڤێنیزم و فاسیزم] هەر کۆنەپەستی و دەمارگیری لە بەرانبەرەکەدا دروستدەکەن و بەرهەمدەهێننەوە. ئەزموونی دوو سەد ساڵەی خەباتی بندەستان بۆ ڕزگاری و ئازادی و سەربەخۆیی و یەکسانی و دادپەروەریی نیشانداوە، کە ڕامیاریی لە خەباتی کۆمەڵایەتی دوورماندەخاتەوە و پەیوەندییە کۆمەڵایەتییەکان هەڵدەوەشێنێتەوە و دەمانکاتە تاکی دەمارگیری پارتیی و بێجگە لە کۆنەپارێزیی ئایدیۆلۆجیا، هیچی دیکە دەرکنەکەین، ئەندامی گروپ و پارتییەکان وەك زیندانییەكن، کە هەواڵ و پرسەکان لە دەمی زیندانەوانەکانەوە دەبیستێت و لێی دەبنە ڕاستی بێچەندوچوون. بێچگە لەمەش نزیکترین ئەزموونی سەردەمی ئێمە ٢٢ ساڵی ڕابوردووە، کە پارتایەتیی ڕیزی یەکگرتووی ڕاپەڕیوانی شۆڕشگێڕ و لایەنگرانی بزووتنەوەی شورایی هەزار پارچەکرد و هێشتاکەش تاوەکو پارتایەتی بەناوی سۆشیالیزم و کۆمونیزمەوە لە بڕەودابێت، بەدڵنیاییەوە پارچە پارچەبوون و لەیەك دوورکەوتنەوە بەردەوامدەبێت، چونکە سروشتی دەسەڵاتخوازانەی ڕێکخستنی رامیاریی پەیوەندییەکان دەگۆڕێت بە پەیوەندی ڕابەر و پاشڕەو، فەرماندەر و فەرمانبەر لەنێوان سەرانی ڕێکخستن و ئەندامانی خوارەوەی ڕێکخستن، کە دواجار ململانێی دەسەڵاتخوازانە دەئافرێنێت و جیابوونەوە و لێکدابڕان دەبێتە چارەنووسی بێچەندوچوون، بێجگە لەوەش ڕێکخستنی ڕامیاریی لە ڕادیکاڵترین باریدا بەناوی سۆشیالیزم و کۆمونیزمەوە، تەنیا وێنەگرتنەوەی [کۆپی] کۆمەڵی چینایەتی و پەیوەندییە سەر و خوارەکانی و نایەکسانی پێگە و بڕیاردان بەرهەمدەهێنێتەوە !

ئەگەر نەگەرێمەوە سەر مێژووی چەپایەتی لە ساڵی ١٩٣٦ [دروستکردنی حشع] لە عیراق و کوردستان، ئەوا مێژووی دوو دەهەی ڕابوردوو پڕە لە بەکوشتدان و بەفێڕۆدانی وزە و خەبات و ژیان و گیانی لاوانێکی دڵسۆز لەپێناو ئەنجامدانی تاکتیك و ستراتیژی هەڵەی پارتایەتیی، کە تەنانەت لەم ساتەدا خودی سەرانی ئەو پارتانەی کە لە شیری کۆمونیزمی کرێکاری دروستبوون، نایانەوێت ناویانبهێنرێت و بە هەموو شێوەیەك هەوڵی داپۆشانیان دەدەن؛ هەر لە دروشم و بەرنامەوە بگرە تا سەرکوتکاریی نێو ڕێزەکانی خۆیان!

بەداخەوە لەم ڕۆژگارەشدا وێڕای هەموو ئەو ئەزموونانەی کە چەوتی و نیگەتیڤبوونی دروشم و چالاکی و بەرنامەکان دەسەلمێنن، کەچی هێشتا لاوانێکی خوێنگەرم هەن، کە بازاری پارتایەتی چەپ گەرم ڕادەگرن و دەبنەوە بە قوربانی ڕامیارییەکانیان.

ئازیزان، خەباتی چینایەتی، خەبات و بەرەنگاریی کۆمەڵایەتییە، نەك پاڵەوانبازیی تاك و هەوڵی ڕامیاریی و دنەدانی پارتایەتیی. قورئان تەنیا پەرتووکێکە و بێگیان، سووتاندنی هیچ کاراییەکی پۆزەتیڤی نییە، بەڵکو تەنیا ئاییندارانی خۆشباوەڕ تووڕەدەکات و بەرەو بڕوادارتربوون هانیان دەدات. پێویستە ئێمە دوو شت: قورئان وەك پەرتووکێکی ئایینی لە ئاڵا و بەرنامەی پارتییەکی ئیسلامی جیابکەینەوە. چونکە ئەگەر ئاڵای داعش یا کۆمەڵی ئیسلامی بسووتێنین، تەنیا لایەنگرانی ئەو گروپە تووڕەدەکەین و زۆرینەی ترساوان لە هێرشەکانی داعش دەستخۆشیمان لێدەکەن، بەڵام کاتێك کە قورئان دەسووتێنین، ئەوا ملیارد و نیوێك کەس لە خۆمان توورەدەکەین و بەو کارە دەبینە هاندەریان بۆ دەمارگیرتربوون لەسەر باوڕەکەیان و هەروەها گشت دەرگەکانی تێگەییشتن لە ئامانج و خەونی مرۆڤدۆستانەکان بەڕوویاندا دادەخەین.

لەبەرئەوە ئەوی پێویستە لە بەرانبەر هەژموون و مەترسی ئیسلامییە رامیارەکان بکرێت، خۆڕێکخستنی جەماوەرە، پێکهێنانی یەکینەکانی خۆپارێزیی جەماوەرییە، پێکهێنانی ڕێکخراوە جەماوەرییە سەربەخۆکانن، دروستکردنی دیالۆگی کۆمەڵایەتییە، ژیاندندنەوەی بڕوابەخۆبوونی تاکی بندەستە بە هێز و توانای کۆمەڵایەتیی خۆی لە بەرهەمهێنادا، ژیاندنەوەی هەرەوەزی و هاریکاری و خۆکۆمەکیی کۆمەڵایەتییە، هەوڵی دوورکەوتنەوەیە لە وەرەمی ڕامیاریی و چۆلکردنی ڕیزی پارتییەکانە، گوێنەگرت یا وەڵامدانەوەیە بۆ/بە ئەوانەی کە خۆیان کردوووەتەوە سەرۆك و ڕابەر و دەمڕاستی خەڵكی چەوساوە و بندەست!

ئازیزانم، تکایە ئاگاتان لە خۆتان بێت، دەزانم ئێوەش دەبیتە قوربانی نەزانی و هاندانە چەوت و دەسەڵاتخوازانەکانی چەپ. ئەگەر ئێمە لەتەك هاوچینان و هاودەردانی دەوروبەرماندا هوشیاریی بگۆڕینەوە و هەوڵی پێکهێنانی کۆڕ و کۆمەڵە کۆمەڵایەتییە سەربەخۆ و دابڕاوەکان لە ڕامیاریی بدەین، ئەوسا دەبینین کە چۆن قورئان وەك پەرتووکێکی ئەفسانەیی هیچ کارایی نامێنێت، ئەوسا دەبینین کە خەباتی چینایەتی تەنیا لە سەنگەری کۆمەڵایەتییدا سەرکەوتن بەدەستدەهێنێت و ڕامیاریی و پارتایەتی مۆرانە و ژەنگە بە جەستەی بزووتنەوەی ئازادیخواز و یەکسانیخواز و دادپەروەیخوازییەوە!

هیوادارم خۆتان لە گروپە دەسەڵاتخواز و ڕامیارەکان دووربگرن، چونکە زۆر کەسیان بە کوشتدا و لەبیرکران و هەروا بەدڵنیاییەوە کوژرانی ئێوەش هەمان چارەنووسی دەبێت.

تێبینی: مانگی دێسەمبەری ١٩٩٥ نامەیەکی لەم جۆرەم بۆ هاوڕێی تیرۆرکراو (شاپوور عەبدولقادر) نووسی. بەداخەوە ئەو لە ژیاندا نەما، تاوەکو ببینێت کە پارتیی و ڕامیاریی پێشڕەو ڕێکخەری خەبات و بەرەنگاریی چینایەتیی نین، بەڵکو ڕامیاریی و پارتایەتی پارچە پارچەکەری ڕیزی خەباتکارانی سۆشیالیزمخواز و لەنێوبەری بڕوا و متمانەیانە بەخۆیان و بە هاوڕێکانیان و تەنانەت وەك دەبینین، هاوڕێکانی سەردەمی ڕاپەڕینی هەنووکە لەنێو خۆیاندا بوونەتە دوژمنی ڕامیاریی و ئایدیۆلۆجی و پاریاتەیی یەکدی، لەوەش خراپتر زۆرێك لەوانە لە ناهوشیاریی و نائومیدیدا ئێستا قسەکەری لیستە کۆنەپارێز و دەسەڵاتخوازەکەی بەناو “گۆران”ن!

هاوڕێتان
هەژێن